«Калі анёлы адышлі ад іх на неба, пастухі сказалі адзін аднаму: “Пойдзем у Бэтлеем і паглядзім, што там сталася і пра што абвясціў нам Пан”. І пайшлі яны, спяшаючыся, і знайшлі Марыю і Юзафа, і Немаўля, якое ляжала ў яслях». (Лк 2, 15-16)
Б ожае Нараджэнне, апісанае ў Евангеллі, нясе ў сабе шмат цікавых падказак для сучаснага чалавека. Адна з іх звязана з каштоўнасцю, якой з’яўляецца сям’я. Сёння, калі чалавецтва перажывае крызіс вернасці і сталасці сямейных адносін, святая сям’я Юзафа, Марыі і Езуса можа паказаць нам шлях да сапраўднага шчасця. На іх прыкладзе мы бачым, што сумеснае перажыванне цяжкасцей толькі ўмацоўвае адносіны. Святой Сям’і давялося прайсці і праз непаразуменні, звязаныя з зачаццем Езуса, і праз недарэчнасць Яго нараджэння ў стайні, і праз вымушаныя ўцёкі ў Егіпет. Усё гэта толькі зрабіла адносіны Юзафа і Марыі больш глыбокімі і трывалымі.
Ж адаем усім, хто святкуе ўрачыстасць Божага Нараджэння, у гэтыя дні асабліва адчуць каштоўнасць сям’і і радасць прысутнасці блізкага чалавека. Няхай нараджэнне Збавіцеля паспрыяе прымірэнню тых, хто пасварыўся, адорыць надзеяй тых, хто яе страціў пад цяжарам жыццёвых выпрабаванняў, дасць сілы жыць і змагацца за сямейнае шчасце.
Няхай добры Бог благаславіць Вас!!!
а. Чэслаў Курэчка МІС
а. Андрэй Сідаровіч МІС
КаталІцкае прылажэнне
