Субота — ІІ Велікодны тыдзень
ПЕРШАЕ ЧЫТАННЕ
Дз 6, 1–7
Выбралі сем мужоў, поўных Духа Святога
Чытанне Кнігі Дзеяў Апосталаў.
У тыя дні, калі колькасць вучняў павялічвалася, эліністы пачалі наракаць на габрэяў, што яны забываюць пра іхніх удоваў у штодзённым служэнні. Тады Дванаццаць склікалі ўсіх вучняў і сказалі: Нягожа, каб мы занядбалі слова Божае і служылі пры сталах. Таму, браты, выбярыце з вашага ліку сем мужоў добрай славы, поўных Духа і мудрасці, якім даручым гэтае служэнне. А мы ўвесь час будзем трываць у малітве і служэнні слова. Спадабалася гэтая мова ўсёй грамадзе, і абралі Стэфана, мужа поўнага веры і Духа Святога, і Філіпа, і Прохара, і Міканора, і Тымона, і Пармэна, і Мікалая празеліта з Антыёхіі, якіх паставілі перад апосталамі. Яны, памаліўшыся, усклалі на іх рукі.
А слова Божае пашыралася, і значна павялічвалася колькасць вучняў у Ерузалеме. І шмат святароў прыняло веру.
Гэта слова Божае.
РЭСПАНСАРЫЙНЫ ПСАЛЬМ
Пс 33 (32), 1–2. 4–5. 18–19 (Р.: 22)
Рэфрэн: Міласэрнасць Твая, Пане, няхай будзе над намі.
Або: Аллелюя.
1. Радуйцеся ў Пану, справядлівыя, *
праведным належыць хваліць Яго.
2. Слаўце Пана на гуслях, *
грайце Яму на дзесяціструннай арфе.
Рэфрэн:
4. Праўдзівае слова Пана, *
і ўсе ўчынкі Ягоныя верныя.
5. Ён любіць справядлівасць і правасуддзе, *
міласцю Пана поўніцца зямля.
Рэфрэн:
18 Вока Пана над тымі, хто Яго баіцца *
і хто спадзяецца на Яго літасць,
19. каб Ён душу іх уратаваў ад смерці *
і накарміў іх у час голаду.
Рэфрэн:
СПЕЎ ПЕРАД ЕВАНГЕЛЛЕМ
Акламацыя: Аллелюя, аллелюя, аллелюя.
Уваскрос Хрыстус, які ўсё стварыў
і злітаваўся над чалавецтвам.
Акламацыя: Аллелюя, аллелюя, аллелюя.
ЕВАНГЕЛЛЕ
Ян 6, 16–21
Убачылі Езуса, які ішоў па моры
+ Чытанне святога Евангелля паводле Яна.
Калі настаў вечар, вучні Езуса сышлі да мора, селі ў човен і паплылі на другі бераг мора ў Кафарнаум. Ужо цямнела, а Езус не прыходзіў да іх. Дзьмуў моцны вецер, і мора хвалявалася. Калі праплылі каля дваццаці пяці ці трыццаці стадыяў, убачылі Езуса, які ішоў па моры і набліжаўся да чаўна, і спалохаліся. Ён жа сказаў ім: Гэта Я, не бойцеся. Хацелі ўзяць Яго ў човен, але човен адразу прыстаў да берага, куды яны плылі.
Гэта слова Пана.
